se cau lo cmene na xlali
sei la visuuavas cimborskas ku no'u la'o py Wisława Szymborska py te pemci
sei la uakci ku fanva
sei ti'e lo lerpinsle pa moi ku ji'a cmene

i snuti fa lo nu mi zasti je cu viska
i da rinka lo nu zutse ne'a lo tricu
ca lo solcfu cerni
i vajni fasnu na
je nai cu jai balcitri
i na ku nu jamna ca'o ja co'u
je se lanli be do'e lo mukti
i na ku selmo'i ei nu catra zu'e lo turni

i ku'i zutse ne'a lo rirxe noi'a fatci
i vi zvati i ni'i bo
su'o da te tsuku
i pu bo
zvati so'i drata
i tamsmi lo terdi facki
pe pu lo nu co'a klama

i lo ricfu cu purci ke ji'a lo nontezmo'i teirmokca
je lo mumdei noi purci lo xavdei vau
je lo pe se li'e lo xavma'i ku mumyma'i
i se balvi lo fatci
co dunli
be zo'ei lo darvistci pe lo jatna

i ti poi tricu cu poplu je cu se jicmu lo sorna'a
i ti po'u la rabas na rirxe co'a lo cabdei
i te prina pluta bu'u lo demspa na co'a lo prulamdeiprulamdei
i lo nu lo brife cu daspo lo dilnu
cu se purci lo nu zvari'a dy

i ku'i ji'a no vajni vi fasnu
i je lo vanbi na ri'a ku to'e tcilycfu
ja cu rinka se skicu co mabla ja cu satci vau vau
mau tu'a lo nu lo nonxa'u girzu cu posxu'a

i ke po'o nai lo se mipri selzu'e cu se kansa lo nunsma
i ke po'o nai lo nunco'atru cu go'i lo rinka sorsormei
i cukla fa lo po'o nai nungunta nanca bo nunsla
je lo ji'a selpo'i rokci pe lo ri'erkoi

i pluja je denmi fa lo krinu stura
je lo se fenso be lo manti bei bu'u lo srasu
be'o je lo sy tednerzbe
je lo tezbo'a be lo pagre be lo grana

i snuti fa lo nu mi zasti je cu viska
i lo blabi toldi ga'u na'irmuvgau ne'i lo vacri
lo se steci be tu'a vo'a i je pagre lo mi xance fa lo ctino
be ma kau na je lo me vo'a moi

i viska ti na ja co'a tolbirti
lo du'u lo vajni
cu vajmau lo nalvai