lo xa pemci be fi la anas pogonofskas

sei la'o py Anna Pogonowska py finti
sei la uakci ca la'e li 22 bi'u 24 dy 6 ly 2017 ny fanva

i ti'e ca lo porpi ratni cedra

i ti'e ca lo porpi ratni cedra
cu to'e cnino tcaci fa lo ni krici tau lo cevni
i ja'o krici ma i lo xu palci bapli
poi jai xlura ma'a fo lo ka zasti

nonpa'a

i na ai cmedu'a fi lo krinu be lo nu farlu fa lo mi
kalgai i nu dandu fa lo xance be mi
i kecti lo voi pu mibypre je lo voi ri
pu ka'e binxo
i ta'i ma kecti fi tau lo jai cabna fe lo na jai cabna

la vinsent van gox

i lo caltai be lo rulpra spatrle'okari
do jai se merli —
i kancu
lo kilto barna
co banli —
i fe lo mivru'e dinlu
cu jabre fi lo namcu
noi jai roi darxi fa lo burcu je lo risna

i lo dilnu cu sarlu tai lo linsi
i lo dertu cu cecla lo crino
i lo maxri cu gacri lo kanla
i lo korvo — noi kolme pulce lo nonmei
cu se tisna lo solri sefta
i doi la van gox
fe lo clupa co skari
fa do tratygau xu'o

i do ri'urgau lo guska'u —
i ta'i lo fagri sarlu je lo danmo seljmaji
cu nalcaigau lo gusni
i pifygau ma i jgari ma
i stali fa lo kolpu'o je lo tabjoikijno

i ca lo nu kakpa lo zirpu pe lo dertu
je cu pinxe lo pelxu pe lo tsani
cu cpesku fa la cevni lu «ko'oi fi mi
fe lo kamdri be lo do se skari
i ko'oi fi mi fe lo se klaku je lo se tatpi je lo rokci vu'o pe do» li'u

i xekri je nalmu'u
fa lo canlu be lo tanbargu —
i skavrici pimlu la palcei
i spoja fa lo ji'a xekri velxraba'a
noi se kalgau fo lo vacri

lo mi jetnu

i so'i mei fa lo jetnu i mi
bi'ai cusku se pi'o lo moklu be pa jy
poi lo tarmi be ki
cu se pagbu dunli mi

i na kufra
i viska se nabmi
i tirna co mabla
i jimpe se nandu

i ku'i mintu mi i joi mi ra mintu
i na sezmlugau fo tau lo pimlu be su drata
be'o noi ka'e lafti
lo po'o xadni joi nai risna

i ji'a ca lo nu mrobi'o fa mi
cu stali fa ra

na

i ai ga'orgau lo kanla i na djica
lo ka xisli joi ctile se pa'u ti
noi cabra i na

i ei po'o ke noi ciblu dirgo
vau mi muvdu fo lo cy denxi'u

i da'i rulpra ta'i tau lo furtirse tsiju
i spabi'o da'i

i setca lo denci
be lo pezlycto nunspo

zerfu'e

i pe'i dai mi co'e
i pe'i do co'e
i cu'u ma'a ta co'e
i ro vizyzva cu zerfu'e cu'u da
i da galtu lafti lo stedu be da
i da dizlo falgau lo mebri be da

i ti noi frili selzga te frica
cu jai nu ka'e bandu
fi tau lo catra gusni sirji
be lo camrai flira