no da re roi fasnu
sei la visuuavas cimborskas ku no'u la'o py Wisława Szymborska py te pemci
sei la uakci ku fanva

ni'o no da re roi fasnu¹
ja ba² fasnu i se ta'i
bo lo jbena na'o tolcre³
i bo krefu claxu canci

i fau lo ji'a nu ma'a
traji lo ka to'e prije
zo'u ju'o nai reflifri
tau su dunra ja su crisa

i no djedi da se krefu
i lo nicte vo'a drata
i nu cinba ja kalcatlu
kei fa no na sevzi panra

i lo prulamdjedi li'i
do se cmene lo se krixa
kei fi mi te cinmo tau lo
ka lo rozgu ce se viska¹⁰

i ma'a ca kansa vo'a
i na farna lo do mokca¹¹
i pei rozgu i ma simsa
i xu spati i xu rokci

i doi mabla temci ri'a
ma do selpau¹² co nu terpa
i lo cabna da ei purci
i lo melbi ku nu cenba¹³

i ge gleki gi jairsi'u
i joi tugni troci tcena
i ju ku'i simxu frica
tai lo jinsa digjau re mei¹⁴

  1. ge lu «no da li re rapli» li'u gi lu «no da re roi fasnu» li'u lakne xe fanva
  2. lo jbobau panra zo'u cizra i lu «fasnu je ba fasnu» li'u no'e zmadu fi lo ka ricfu lo ka se smuni kei kei lu «fasnu» li'u i ku'i jmina lo se nitcu nai tcila te zu'e lo nu zenba lo ka panra lo se fanva
  3. zo «tolcre» smuni sampu zmadu lo valsi pe lo krasi pemci i lu «na'e se sampu ri'a lo nu na krefu zukte i ja na slabu i ku'i lo nu pemci fanva ku larcu lo ka jarco tau lo mo'a lo traji be lo ka jai se kakne ku ku smuni pagbu vau li'a
  4. za'u re'u smuni sampu i krasi fa lo se smuni be lu «voi lo so'i djedi ku simxu lo ka dunli fi lo ka ki pagbu» li'u
  5. pilno zo «morsi» na je zo «canci» te zu'e lo nu rimni
  6. lu «to'e prije traji tadni» li'u panra i na ku'i pilno zo «tadni»
  7. lu «su crisa ja su dunra» li'u krasi i lo nu ei rimni ku mukti lo ka basti simxu gasnu
  8. lo lojbo na drani i ro da se krefu su'o da i go'i fi li pa i ku'i lo pemci ku jai bu'u ba'u zei cusku
  9. zo «lo'e» zmadu i ji'a lo drani traji ku simsa da'i lu «ro da poi nicte zo'u da ro de poi da drata vau frica» li'u noi dukse ba'e carmi clani
  10. lu «tamsmi lo nu lo rozgu ku vofli klama fo lo canko canlu» li'u i ba'o ei vimcu lo si'o vofli iau oi dai
  11. lu «lo mi flira lo bitmu ku farna» li'u drani je ku'i ja'a jai nandu fai lo ka sarxe lo rimni stura i ji'a fu'i nai zo «mokca» muljbi lo ka pavdzakai lo ka rimni zo «rokci»
  12. lu «ki'u ma do mixre do jo'u lo se terpa» li'u clani i no da zabna lujvo lo si'o ka'ei bo'a mixre bo'a jo'u bo'e i mu'i pilno zo'ei zo «pagbu»
  13. lu «ja'a lo nu prubi'o ku ra'u melbi» li'u
  14. zo «digjau» cizra lujvo i ku'i lo xamgu panra no'u zo «jaurdirgo» na tordu banzu fi lo ka se pilno