la nu xebni
sei la visuuavas cimborskas ku no'u la'o py Wisława Szymborska py te pemci
sei la uakci ku fanva

i ko catlu lo nu kanro
je tolspofu renvi
za'o lo cedra pe ma'a fa la nu xebni
i frili snada tau lo nandu zunti
lu'u je lo ka plipe je kavbu

i frica lo selcni poi drata
i laldo joi gi zmadu gi mleca
i nonseka lo ka finti lo krinu lo ka di'a tolcando
i no nu sipna cu nu vitno sipna

i lijda xu kau
i se ju cidnytse ca lo nuncfari
i jbegu'e xu kau
i se ju sukmu'u co'a lo nu bajra
i xamgu ca lo tolfa'o fa ke ji'a lo ka pairnu'i
i ba zo'e sutra klama se'a dai
i nu xebni i nu xebni
i lo flira cu korcu
ri'a lo nu prami fizbu

i oi lo drata se cinmo
cu ruble je masno
i co'a ma lo ka cecmu lanzu cinmo
cu bapli tau lo sorpre
i lo ka cnida cu su xu roi
pa moi fi lo ka clira
i trina fa ke po'o xy noi djuno mau'a ralju vajni

i stati je jmicre je gunkycfu bo mutce
i be'u pei pau nai jungau fi lo du finti xo kau se sanga
i du moirtcitygau xo kau papri pe lo citri
i du punji xo kau remna lolgai
bu'u xo kau panka ja keldi'u

i ai mi'o fi vo'a na jifsku
i xy ka'e jai gau barna
i zabna fa lo xy gusni pe ca lo xekri nicte
i banli fa lo danmo dilnu pe vi lo xunblabi ctefa'o
i e'e nai skicu ga fo lo ka na betri banli kei fe lo dijvelvi'u
gi fo lo ka na sampu xalbo
kei fe lo kamju poi ga'u toltatpi sanli

i ny balcre tau lo zamfrica
pe lo fanza savru jo'u lo smaji
je ke lo xunre ciblu jo'u lo blabi snime
i ru'i se rai zdile xy
fa lo tcini noi nu lo vrude
cu kavbu lo nalvrude

i fe tau lo cnino jibri ro roi bredi
i va'o lo nu denpa nitcu cu denpa
i ti'e visnalka'e i visnalka'e xu ia cu'i
i se kanla lo jundi pe tai lo suksa catra
i darsi catlu fa'a lo balvi
fa xy po'o